موسوعة شعر وشعراء العامية المصرية

موضوع: كتاب القراءة السبت أكتوبر 02, 2010 4:11 pm

كتاب القراءة

بمنتهي البراءة ...
سأليتني …
بنتي نور ....
ف أربع خمس ..
أمور …
مش ف كتاب القراءة ....
قالتلي .. بابا بابا ..
مش إنت .. يا بابا ..
بتكتب أغاني ..
وتقول أشعار ..
أنا سمعت ..
الشيخ يا بابا ...
بيقول إنك يا بابا …
ها تروح النار ...
زي الوحشين يا بابا ...
الحراميين الكفار ....
قوللي يا بابا ....
يعني إيه إستعمار ....
يعني إيه نيل ...
يعني إيه هرم ..
ومين اللي حط ...
النسر فوق العلم ...
يعني إيه يا بابا ...
إستفتاء ….
و يعني إيه إنتخاب ...
ويعني إيه حر ...
ويعني إيه نصاب….
يعني إيه إختلاس ..
ويعني إيه هجاص ..
ويعني إيه خصخصة ..
يعني إيه يا بابا ....
دستور ….
يعني إيه معارضة ..
ويعني إيه مظاهرة ..
وليه النهاردة ...
خدنا أجازة ...
م المدرسة .....
قوللي يا بابا ....
يعني إيه قهر ..
وفين …
خط الفقر ...
ويعني إيه حظ ..
ويعني إيه زهر ...
يعني إيه يا بابا ...
حريه …..
يعني إيه إنسان ..
ويعني إيه سرطان ...
يعني إيه يا بابا ...
خربوها ….
ومين دول يا بابا ..
ولاد القطقوطة ...
ومين دي ...
سمارة يا بابا ....
وإزاي يا بابا ...
ضاعت من قلبك ...
يا بابا .....
إنت معايا ....
فيه يا بابا ناس ...
بتقول كفايه ...
وفيه كمان عساكر ...
مسكين عصايا ...
وبنات متعورين ...
وتانين …
ماشين بيضحكوا ...
هما دول إسرائلين ..
يا بابا .....
ويعني إيه ...
ويعني إيه ...
قولتلها ….
نور …..
ممكن أسألك سؤال
قالتلي ….
إتفضل يا بابا ...
قلتلها ….
هيه قناة Space toon ...
رقم كام …..
وخدتها .....
عشان تنام

بقلم:على سلامه

موضوع: أحب اعرف نفسي السبت أكتوبر 02, 2010 4:13 pm

أحب اعرف نفسي

احب اعرف نفسي.. وارسمها
واكسيها
واعرّيها
واورّيها كل ما فيها
واخبى الحلو عن نفسي
لتفرح يوم بما فيها
*******
واحب اقعد مع نفسي.. واواسيها
واقضي ليلي ادلّعها
وساعات يمكن اولّعها
ويدوب الحق واطفيها
وساعات اصرخ
ده من ألمي
انا اصلي ماسك قلمي
ومسطرتي
وادواتي.. بخططها.. واظبطها
اهندسها.. والخبطها
*******
بحاول اخترع حلمي
واقول يا نفسي لو شفتي
او اخترتي
انا غيرك.. انا نفسي
ماشوفش الاّ من طاقتي
وعيني هي اقلامي
واحلامي
وحلمي هوّا مشروعي
ومسموحى
وجورنالي.. ومنشوري
وحلمي ماكونش غير نفسي
انا مصري
*******
انا مصري كريم العنصرين
انا القلعة.. انا المدنه.. انا الازهر
انا الاقدم.. انا الاكبر
انا مصري.. وده قصري
على نيلي.. على كيفي
انا نفسي
وانا عاشق كده نفسي
وعاشق ميّتي.. وطقسي
يامصر يا عشقى.. لو تقسي
نجوع.. نشقى.. ونتعارك
وعمرى ما اخون فى يوم نفسي
*******

موضوع: كلمتين الى مصر السبت أكتوبر 02, 2010 4:15 pm

كلمتين الى مصر

كل عين تعشق حليوة

و إنتي حلوة في كل عين

يا حبيبتي أنا قلبي عاشق

و اسمحيلي بكلمتين

كلمتين يا مصر يمكن

هما أخر كلمتين

حد ضامن يمشي آمن

أو مِـآمن يمشي فين

..........................

شابة يا أم الشعر ليلي

و الجبين شق النهار

و العيون بحرين أماني

و الخدود عسل و نار

و اللوالي ( اللؤلؤ) بابتسامتك

يحكوا أسرار المحار

يللي ساكنة القصر عالي

إيمتى يهنالي المزار

كلميني يا صبية

طال علي َّ الانتظار

كلمتين يا مصر يمكن

هما أخر كلمتين

حد ضامن يمشي آمن

أو مِـآمن يمشي فين

.....................

قصرك المسحور غيلانو

أغبى من دود الغيطان

بعد مص الغصن الاخضر

ينحتوا عضم العيدان

و اللي خلى الارض خضرا

و اللي خلى الدار آمان

عاش بجور ملو جوفه

مات بخوفه من الغيلان

طوّع الغلبان

ما قالش عن شقا العمر اللي كان

كلمتين بمصر يبقوا

هما أخر كلمتين

حد ضامن يمشي آمن

أو مِـآمن يمشي فين

....................

أدي كلمة من عذابي قلتهالك

باقي كلمة

من حنيني صنتهالك

في الضلوع من دنيا ظلمة

كنت خايف يلمحوها

يقتلوها في سكة ظلمة

سقسقت و النور بشاير بشاير

زهرة الصبار يا سلمى

يا نسيم الشوق يا طاير يا طاير

خد لمصر في الصبح كلمة

طول ما يبقى الركب ساير

بالبصاير و العينين

يبقى ضامن يمشي آمن

يبقى عارف يمشي فين

احمد فواد نجم

موضوع: سيدي الرئيس السبت أكتوبر 02, 2010 4:24 pm

سيدي الرئيس
في عيد ميلادك الكام وسبعين

كل سنة وانت طيب
واحنا مش طيبين
كل سنة وانت حاكم
واحنا محكومين
واحنا مظلومين
واحنا متهانين
ويا تري يا حبيب الملايين
فاكرنا ولا احنا خلاص منسيين
فاكر المعتقلين
فاكر الجعانين
فاكر المشردين
فاكر اللي ماتو محروقين
فاكر الغرقانين
الله يكون في عونك - ها تفتكر مين وللا مين
في عيد ميلادك الكام وسبعين
بقول لك كلمتين
الأوله
شيلتنا طين
و هل تعلم أن النيل بقي رشاح
و الجو
أصبح بيئة والعيشة ولعة
و الشرفا قلوبهم عالبلد والعة
و انت عاملهم مذبحة ولا بتاعة القلعة
و الإقتصاد سداح
و السرقة بقت كفاح
و مصر متاحة بس للسياح
و عرض البلد بقي مستباح
و الثانية
ورتنا الويل
دا الخطوة في عهدك بقت ميل
و الضحك بقي نواح و عويل
و الكوسة
عارف الكوسة
ممكن أقول لك فيها مواويل
و الجامعة بقت يا إما كباريه أو دار مسنين
و الشباب معظمهم من غير خمرة سكرانين
و العلم عز علي المتعلمين
و الأساتذة بقم دجالين
و القادة بقم طبالين
و اديني في الهايف يا حبيب الملايين
و الثالثة
عارف اليابانيين
زمان في سنة اتنين و خمسين
كان عندنا تروماي و كان عندنا علم و متعلمين
و ثقافة و مثقفين
و أدبا و علما و فنانين
و كانو اليابانيين
بالنووي لسه مضروبين
و للصدقة مستحقين
دلوقتي إحنا فين و هما فين
هما فوق و احنا في أسفل سافلين
و الرابعة
أمن بلدنا بقي تنين
و المحاكم اتملت مظالم
و العدالة بقت كمالة
و كلمة الحق في الزبالة
و أصحابها في الزنازين
و الخامسة
القطاع العام....عام
و الفساد.....ساد
وفي جتة بلدنا بيرعي
أفتكر لجنابك إيه و للا إيه
و كل ذكري ليك بدمعة
آآآآآآآآه آآآآآآآآه
أنا كنت حالف ميت يمين
أكملهم لك تمنية و سبعين
بس ها كفيهم ورق منين
و كل سنة و انت ............
و احنا طيبين

احمد فؤاد نجم

الفار الى الله........الابنودى

الفار الى الله

الدنيا كلام ... بنسمعه او بنقراه او بنشوفه او بنفكر فيه... بس فى النهايه مجرد كلام
شهداؤنا في كل شبر يصرخونْ.. يا أيها المتنطعونْ..

كيف ارتضيتم أن ينام الذئب..

في وسط القطيع وتأمنونْ؟

وطن بعرْض الكون يُعرض في المزاد..

وطعمة الجرذان..

في الوطن الجريح يتاجرون..

أحياؤنا الموتى على الشاشات..

في صخب النهاية يسكرون..

من أجهض الوطن العريق..

وكبل الأحلام في كل العيون..

يا أيها المتشرذمون..

سنخلص الموتى من الأحياء..

من سفه الزمان العابث المجنون..

والله إنا قادمون..

"ولا تحسبن الذين قتلوا في سبيل الله أمواتًا

بل أحياء عند ربهم يرزقون"

****
شهداؤنا في كل شبر..

في البلاد يزمجرونْ..

جاءوا صفوفًا يسألونْ..

يا أيها الأحياء ماذا تفعلونْ..

في كل يوم كالقطيع على المذابح تصلبونْ..

تتنازلون على جناح الليل..

كالفئران سرًّا للذئاب تهرولونْ..

وأمام أمريكا..

تُقام صلاتكم فتسبحونْ..

وتطوف أعينكم على الدولارِ..

فوق ربوعه الخضراء يبكي الساجدونْ..

صور على الشاشاتِ..

جرذان تصافح بعضها..

والناس من ألم الفجيعة يضحكونْ..

في صورتين تُباع أوطان، وتسقط أمةٌ..

ورؤوسكم تحت النعالِ.. وتركعونْ..

في صورتين..

تُسلَّم القدس العريقة للذئاب..

ويسكر المتآمرون.."يايها الذين امنوا لا تتولوا قوما غضب الله عليهم..قد يئسوا من الاخرة كما يئس الكفار من اصحاب القبور

الابنودى

موضوع: بخمسين قرش السبت أكتوبر 02, 2010 4:28 pm

بخمسين قرش

بخمسين قرش ترفع ميكرفونك

لوش الفجر , و زيادة شويه

و خمسين قرش , توضع نص درهم

في جيب خصمك و ترميه في بليِّه

و خمسين قرش , تنهب أجزخانه

من المستشفيات القاهرية

و خمسين قرش , يعفيك المفتّش

من الغرامات , و يشطب لك قضيه

و خمسين قرش , تتبدّل محاضر

بتهمه عليك و تتحوّل عليه

و خمسين قرش , شيخ حارتك يخلِّي

ولادك , يهربوا من العسكريه

و خمسين قرش , محفظتك تعود لك

من النشال بالوسطه القويه

و خمسين قرش أكتب لك مقاله

بأنك من رجال العبقريه

بيرم التونسي

دعاء الحكام العرب في العام الجديد

اللهم ثبتنا على كراسينا!
وبارك لنا فيها!
واجعلها الوارث منا!
واجعل ثأرنا على شعبنا!
وانصرنا على من عارضنا!
ولا تجعل مصيبتنا في حُكمنا!
ولا تجعل راحة الشعب أكبر همنا ولا مبلغ عِلمنا!
ولا الانقلاب العسكري مصيرنا!
واجعل القصر الرئاسي هو دارنا ومستقرنا!

>--------------------
اللهم إنا نسألك فترة ممتدة!
وهجمة مُرتدة!
والصبر على المعارضة!
والنصر على الشعب!
ونسألك الحُسن لكن لا نسألك الخاتمة أبداً!
اللهم ارزقنا معونة لا نسرق بعدها أبدا!
اللهم لا تفتح أبواب خزائننا لغيرنا!
اللهم أعطنا كلمة السر لحسابات الحكام السابقين لنا في بنوك سويسرا!

>---------------------
اللهم وفق أمريكا لما فيه خيرنا!
اللهم اغفر لـ (جورج بوش) فإنه لا يعلم أننا لا نعلم!
اللهم وفقه لما فيه 99% من أصوات الناخبين!
اللهم نجهِ من أي إعصار أو كارثة طبيعية لأننا سنلوص مع شعوبنا من غيره!
اللهم عليك بشعبي، أما أعدائي فأنا سأتفاوض معهم!

>---------------------
اللهم ارزقنا حب أمريكا!
وحب من يُحب أمريكا!
وحب ما يُقربنا إلى حب أمريكا!
>------------------
اللهم أمركني ولا تأفغني!
اللهم برطني ولا تصوملني!
اللهم فرنسني ولا تسودني!
اللهم ألمني ولا تؤلبني!
>------------------

اللهم أني أبرأ إليك من الاستعانة في حكم شعبي بأحد!
ولا حتى بصديق، ولا برأي الجمهور!
اللهم أني أعوذ بك من كرسي يُخلع!
ومن شعب لا يُقمع!
ومن صحيفة لا تُمنع!
ومن خطاب لا يُسمع!
ومن مواطن لا يُخدع!
وأعوذ بك من أن أجلس على الكرسي ثم أقوم أو أ ُقام عنه!
>-------------------------
اللهم ثبتني على الكرسي تثبيتا!
و شتت المعارضة تشتيتا!
ولا تبق منهم شيطاناً ولا عفريتا!
و بارك لي في البارتيتة!
اللهم آآآآآآآآمييييييييين!!!

الكلمات المتقاطعة

أحمد فؤاد نجم

بدل الكوره

ولعب الفوره

وسط الغاغه

والبرجاس

تاكل زغده

تاكلك دبشه

تملا دماغك

بالقلقاس

ياللا نفكر

حتة لعبه

زي السكر

بالأناناس

كلمه ومعنى

رأسي وأفقي

يحكوا حكاية

تهم الناس

قرب قرب

ياللا نجرب

شغل مخك

ولا تحتاس

_ واحد رأسي؟

رأسي بتضرب

تقلب

تشغي بالأفكار

مسرح

والأفكار هوامه

في الدوامه

ليل .. ونهار

أبيض إسود

أخضر ..أحمر

بارد .. حامي

جنه ..ونار

سيبك سيبك

من تغريبك

بكره الليل

يطلع له نهار

_ اتنين رأسي ؟

حاكم حالي

كان طرطور

خان الدار

والجار

والنور

_كل ما فينا من حكام

نازلين

من خنفس .. وكافور

كذبوا _ أفكوا

قتلوا _ سفكوا

غدروا _ خانوا

فضحوا _ هتكوا

_ واحد أفقي ؟

شاعر داعر

ميت .. حي

طالع .. نازل

رايح .. جي

مادح سيده

مادد إيده

لايشوف حاجه

ولا يقول شي

_ كل ما فينا من شعارير

خونه

وهتيفة .. وخنازير

تجروا _ باعوا

لمعوا _ ذاعوا

أفلوا _ غربوا

تاهوا _ ضاعوا

_ اتنين أفقي ؟

شعرا تلاته بكلمه باروده

ناظم

بيرم

بابلو نيرودا (1)

_ كل ما فينا من عشاق

داقوا ما بينا

من أشواق

حبوا _ عشقوا

شبوا _ نشأوا

مروا _ فاتوا

غرسوا _ رشقوا

_ رأسي وأفقي ؟

شاعر واعر

لازم جي

يملا عيون العالم ضي

كل ما فينا من أحزان

تستنظر عاشق فنان

يأتي _ يقبل

طائر _ بلبل

حرفي _ فني

يشدو _ يغني

وطني سكني

أهلي .. قومي

منكم فيكم

صحوي نومي

أنتم فكري

أنتم عملي

منكم توقي

فيكم أملي

هيوا _ لبوا

ثوروا _ هبوا

يشرق _ يسطع

صبح _ مطلع

يزرع _ يبني

نحصد _ نجني

نمرح _ نلعب

نشدوا _ نغني

واحد رأسي

نشدوا نغني

اتنين أفقي

نشدوا نغني

تالت خامس

عاشر ميه

نشدوا نغني

نشدوا نغني

نملا العالم

خضرة عفيه

نشدوا نغني

نشدوا نغني

يا غلبان بلدنا
أحمد فؤاد نجم

يا غلبان بلدنا

يا فلاح يا صانع

يا شحم السواقي

يا فحم المصانع

يا منتج

يا مبهج

يا آخر حلاوه

يا هادي

يا راضي

يا عاقل

يا قانع

ما تتعبش عقلك

فى شغل السياسه

وشوف انت شغلك

بهمه وحماسه

وعود عيالك فضيله الرضا

لأن إحنا طبعا

عبيد القضا

ورزقك ورزقي ورزق الكلاب

دا موضوع مؤجل ليوم الحساب

كمان الصحافه

حتكتب فى حالتك

وتنشر مناظر لخالك وخالتك

وتتطلع يا مسعد عليك الغناوي

وتسمع باسمك

فى قلب القهاوي

تحبك مشيره وبنات الجزيره

وقصه غرامك

تشيع فى الرداوي

يعيش عم مسعد

يعيش يعيش يعيش

يعيش أهل بلدي

همة مين واحنا مين ......أحمد فؤاد نجم

همة مين واحنا مين

هما مين واحنا مين

هما الامر والسلاطين

هما المال والحكم معاهم

واحنا الفقرا المحكومين

حزر فزر شغل مخك

شوف مين فينا بيحكم مين

احنا مين وهما مين

احنا الفعلا البنايين

احنا السنه واحنا الفرض

احنا الناس

بالطول والعرض

من عافيتنا تقوم الارض

وعرقنا يخضر بساتين

خزر فزر شغل مخك

شوف مين فينا

بيخدم مين

هما مين واحنا مين

هما الامرا والسلاطين

هما الفيللا والعربيه

والنساوين المتنقيه

حيوانات استهلاكيه

شغلتهم حشو المصارين

حزر فزر شغل مخك

شوف مين فينا بياكل مين

احنا مين وهما مين

احنا قرنفل على ياسمين

احنا الحرب حطبها ونارها

احنا الجيش اللى يحررها

واحنا الشهدا ف كل مدارها

منتصرين او منكسرين

حزر فزر شغل مخك

شوف مين فينا بيقتل مين

هما مين واحنا مين

هما الامرا والسلاطين

هما مناظر بالمزيكه

والزفه وشغل البولوتيكا

ودماغهم طبعا استيكه

بس البركه فى النياشين

حزر فزر شغل مخك

شوف مين فينا بيخدع مين

هما مين واحنا مين

هما الامرا والسلاطين

هما بيلبسوا اخر موضه

واحنا بنسكن سبعه ف اوضه

» الكنايات العامية المصرية - أشرف عزيز
» اصل الالفاظ العامية من اللغة المصرية القديمة....سامح مقار
» موسوعة الحضارة المصرية القديــــمة
» موسوعة الحضارة المصرية القديــــمة
» قال الشاعر......قصائد مسموعة