موسوعة شعر وشعراء العامية المصرية

موضوع: على اسم مصر السبت أكتوبر 02, 2010 7:40 am

على اسم مصر

على اسم مصر ارفعوا الانخاب واملولي

شدوا الوتر ع القمر يا شباب وغنولي

نسكر على حبها بالفن والاحساس

نسكر ودمع الحماس يملا لنا تاني الكاس

احنا يا حلوه الفدا بس اطلبي وقولي

يا سمره بعيون كده وسنتك لولي

وغنوه الحب تعلا ويسمعوا الحراس

يصفروا ويحضروا بفرقة طبول ونحاس

ويتقفل سجن مصر امام عيون الناس

موضوع: على اسم مصر السبت أكتوبر 02, 2010 7:40 am

على اسم مصر

والمطبعة تدور وتخطف كل إيد منشور

عيش لسة م الفرن طالع ريحته ريحة النور

يا فلاحين يا جنود يا طلبة يا عمال

عدوكم حلف لاستعمار ورأس المال

عاش الطريق لشتراكي قوم يا شعب وثور

وحكمكم حكم اقطاعي عميل مأجور

عاش الكفاح بالسلاح إلى القنال يا رجال

خلوا حياه لنجليز المستقرة محال

والشمس نامت ليلتها وفكرها شغال

موضوع: على اسم مصر السبت أكتوبر 02, 2010 7:41 am

على اسم مصر

القاهرة في اكتئاب والأنس عنها غاب

من عتمة تدخل لعتمة كأنها ف سرداب

أو قرية مرمي عليا ضل هجانة

الحظر م المغربية بأمر مولانا

ومصر في الليل بتولد والبوليس ع الباب

صبية ولاٌدة يابا ولحمها جلاب

طلع الصباح زغرطت في السكة فرحانه

على كتفها مولودتها لسه عريانه

وف لحظة كانت جميع الدنيا دريانة

موضوع: على اسم مصر السبت أكتوبر 02, 2010 7:42 am

على اسم مصر

على كتفها مولودتها وتجري وتنادي

ياولادي من يوم ميلاد الأرض ياولادي

ينهض لها امحتب بدواه يقويها

وبنتاؤر ينشد الاشعار يهنيها

وسعد زغلول يكح يزلزل الوادي

وعرابي يهمس ومصر ترد بتمادي

تقوله آه برضه ثورة جيش وح احميها

بالدم بالروح بكل حياتي ح افديها

اما الأسامي معنديش غير اسمها

موضوع: على اسم مصر السبت أكتوبر 02, 2010 7:43 am

على اسم مصر

مولودة كبرت وشبت في تلات تيام

من هبة هبت .. لثورة لبت الاحلام

والعرش عام راح ايطاليا بعيد ورا البراميل

يا هلترى دي حقيقة والا وهم جميل

ومصر من إمتى كانت حظها بسام

ظهر قميص العرق متشمر الاكمام

أنا شفته عقلي برق وبدأ لصاحبه يميل

نقشت له ف قلبي احلى وأروع التماثيل

بدراعي والمطرقة وبإيدي والأزميل

بهيـة

أحمد فؤاد نجم

بهيـة

يسبق كلامنا سلامنا يطوف ع السامعين معنا
عصفور محندق يزقزق كلام موزون و له معنى
عن الارض سمرا و قمرا
و ضفه و نهر و مراكب
و رفاق مسيرة عسيرة
و صورة حشد
و مواكب
ف عيون صبية بهية
عليها الكلمة و المعنى

***
مصر يا امّة يا بهية
يام طرحة و جلابية
الزمن شاب و انتي شابة
هو رايح و انتي جاية
جايه فوق الصعب ماشية
فات عليكي ليل و مية
و احتمالك هو هو
و ابتسامتك هي هي
تضحكي للصبح يصبح
بعد ليلة و مغربية
تطلع الشمس تلاقيكي
معجبانية و صبية
يا بهية

***
الليل جزاير جزاير
يمد البحر يفنيها
و الفجر شعلة ح تعلا و عمر الموج ما يطويها
و الشط باين مداين
عليها الشمس طوافة
ايدك في ايدنا
ساعدنا
دي مهما الموجة تتعافى
بالعزم ساعة جماعة
و بالأنصاف نخطيها

***
مصر يا امّة يا سفينة
مهما كان البحر عاتي
فلاحينيك ملاحينيك
يزعقوا للريح يواتي
اللي ع الدفة صنايعي
و اللي ع المجداف زناتي
و اللي فوق الصاري كاتب
كل ماضي و كل آتي
عقدتين و التالته تابتة
تركبي الموجة العفية
توصلي بر السلامة
معجبانية و صبية.. يا بهية

***
و يعود كلامنا في سلامنا يطوف ع الصحبة حلواني
عصفور محني يغني
على الأفراح ومن تاني
يرمي الغناوي تقاوي
تبوس الأرض
تتحنى
تفرح
و تطرح
و تسرح
و ترجع تاني تتغنى
اللي بنى مصر كان في الأصل حلواني1969م

حارتنـا

مجـاري ونامـوس
مراية وفانوس
حجـارة وكراسـي
شبـاب ع النواصـي
دقـون ع الكـروش
عـرق ع القـروش
شقـوق في البيـوت
بيـوت في الشقـوق
مسـاءً تمــوت
صباحـاً تفــوق
قديمـة وغبيـة
لبيبـة وصبيـة
فـي ضيق خـرم إبـرة
في غـوط المحيـط
على الـذل صابـرة
دا صبـر الغويـط
***********
أسانـس البـلادة
معسكـر ولادة
خسيسـة وجبانـة
جريحـة ومهـانـة
ما تسمعـش ندهـه
رنيـن الدفـوف
بتاكل ولادهـا
حتـولد ألـوف
ما دام ضعنـا فيهـا
ضـروري نـلاقيهـا
حـارتنـا في الحـواري
علـم ع الصـواري
لو قـال فوقـها
الكنـاري..
تتهـز المشربيـة
***********
يا حـوش آدم
يا دارنا
يا سـاكن حضـن جارنـا
سيدنـا الحسـين تبـارك
شهيـد الإنسانية
مدد سيدنـا وشهيدنـا
يا قايـل ومواعدنـا
يكـون عيـدك
وعيدنا
يوم طلعـة شمـس جايـة
يا حـارة جـوا حارة
يا مجمـع السهـارى
من كـل حي
حـارة..
في الحضـرة الآدميـة
مـدد أنـس الحبايـب
مـدد حاضـر وغايـب
مـدد زيـن الصحايـب
يا سـادة يا موجيـه
***********
فيـك العيـدان هزيلـة
شايلـة الحمـول تقيلـة
ولا باليـد حيلـة
ولا الأيـام هنيـة
سيـدنا الدرديـر يا بابا
مـدد يابو الغلابـة
فـوق الحواري غابـة
بتمـص الآدميـة
صبحـك صبايـا صاحيـه
هاللين من كل ناحية
مـدد يا سيـدي يحيى
توعدنـا باللي هـيّ
يا حارتنـا
يام شيلـة
هـزي الهـلال
وهيـلا..
قدامـك يـوم وليلـة
ع الفرحـة
والعيديـة***********

- أحمــد فؤاد نجـم

إسمي حسين

وسني قريّب م التلاتين
وعندي من الإخوات إتنين
مصري وعصري
وزي بقيت المصريين
والدي موظف في المعاشات
والوالدة زي الستـــات
جوه البيت بتربي وتتعب
لا بتشتكي ولا حتى بتطلب
عايشة ف ضل راجلها سنين
إسمي حسين
*********
حبيت واحدة معايا ف الجامعة
من سنة أولى لغاية رابعة
كنت مناها وكنت عايزها
وملقتش فلوس اتجوزها
وضاع الحلم ف غمضة عين
إسمي حسين
*********
خلّـصت التعليم والجيش
وجواب التعيين ماجانيش
فكرت إني اســافر بره
أو حتى أعمل أعمال حره
بس هجيب راس ماله منين
إسمي حسين
*********
إتعود والدي على ظروفي
وعلى طلباتي وعلى مصروفي
ويقولي اصبر بكره هتفرج
وأنا روحي خلاص ثانية وتخرج
ولا عارف أهرب على فين
إسمي حسين
*********
حاسس إني خلاص عجزت
وإنى لاجيت الكون ولاعشت
الأحلام بتعــاند فيّا
والايام ماليانة أسيّة
والباقي من العمر يومين
إسمي حسين

هنا القاهرة

سيد حجاب

هنا القاهرة
هنا القاهرة الساحرة الآسِرة
الهادرة الساهرة الساترة السافرة
هنا القاهرة الزاهرة العاطرة الشاعرة النيّرة الخيّرة الطاهرة
هنا القاهرة الساخرة القادرة الصابرة المنذرة الثائرة الظافرة
هنا القاهرة القاهرة القاهرة
صدى الهمس في الزحمة و الشوشرة
أسى الوحدة في اللمة و النتورة
هنا الحب و الكدب و المنظرة
نشا الغش في الوش و الإفترا
هنا القرش و الرش و القش و السمسرة
هنا الحب و الحق و الرحمة و المغفرة
هنا القاهرة القاهرة القاهرة
و انا ف قلب دوامتك الدايرة بينا
بصرّخ بحبّك يا أجمل مدينة
يا ضحكة حزينة .. يا طايشة و رزينة
بحبّك و اعفّر جبيني في ترابك
و اعيش في رحابِك و أقف جنب بابك
جنايني أروي بالدم وردة شبابك
يا زينة جنينة حياتنا اللعينة
بحبّك
بحبك
بحبك
يا بنت اللذين
بحبّك

على باب السفارة...............

على باب سفارة كندا..
لمحت ابليس واف ايده استمارة..
بقول له على فين..
قاللي بص..
يا هجرة يا اعارة..
يا عم زهقت كفرت..
ألاقيش معاك سيجارة..
أنا انتهيت خلاص..
لا نافع وسواس ولا خناس..
ولا ليا عيش وسط الناس..
دي عالم مجرمين..
عندكوا فائض ف الفساد في كل البلاد..
ومش محتاجين شياطين..
مليش عيش ف البلد دي..
بقالي سنين عاطل..
وانتوا بتعرفوا
تقلبوا الحق باطل..
وتسلكوا القاتل..
وتمشوا ف جنازة المقتول..
ومفيش مشاكل..
يا عم ده انا بقيت اوسوس بالمقلوب..
وأقول للحرامي كفاية بقى توب..
انت هتعمل كل الذنوب لوحدك..
وانا ابليس..
اشتغل واعظ
ولا كمساري اتوبيس..
يا عم ده انا زمان..
كنت استنى حد ينسى يسمي
وهو بياكل لقمته..
دلوقتي كل اكلكم ملوث
وبصراحة الواحد خايف على صحته..
ده مفيش ضمير اساسا..
عشان اموته..
وكل واحد بمزاجه..
خربانة ذمته..
يا عم ده كل حاجة اتسرقت..
وكده الاجيال الجديدة من الحرامية اتظلمت..
يا راجل ده من كتر ما لطشت معايا..
خرجت في مظاهرة..
مع الناس اللي بتقول كفاية..
وبرضه مفيش فايدة..

الشاعر/علي سلامة.

موضوع: بوابة تفتيش السبت أكتوبر 02, 2010 7:54 am

بوابة تفتيش

بوابة تفتيش علي بابك
كل ما احاول اعدي
تزمر
وبتتشرط وبتتأمر
ارجع ادور تاني وادور
وكل ما اعدي برضة تزمر
طب أدي الساعة....
وأدي حزامي
وأدي بطاقتي
والنضارة
وأدي عنواني
وكل حكايتي
وأدي أمارة...
حتي الفكة الباقية في جيبي
والاشعار...
والمحفظة مفيهاش غير صورتك
ليل ونهار
كل هدومي
زي ما نازل من بطم امي
من غير حتي ورقة توت
وكل ما افوت
البوابة برضك تزمر
ولما لمحني
واحد طيب من الحراس
وقالل اسمعني يا ابن الناس
ارمي الحتة الحلوة في قلبك
وعدي
والبوابة عمرها
ما نزمر

إِحْنا...يَا دُوبْ رَقَمْ

إِحْنا...

يَا دُوبْ رَقَمْ...

والمَتش شَغَّالْ...

فاوِلْ مفِيشْ...

آوِتْ مفِيش...

ومَفِيش ضَربِة جَزاءْ...

وكل يومْ مُوضَة...

وكل دقيقَةْ عرَض أزْياءْ...

وكل شئ للبِيعْ...

ومفِيشْ أكتر مِن الأسواق...

إيهْ يعمل الأدبْ...

وإيه تَعمل الأخلاق...

فِى متشْ...

مِن غيرحَكَمْ...

كتب

على سلامة

موضوع: التوكيل.... السبت أكتوبر 02, 2010 7:55 am

التوكيل

مين دا اللى مصر
عملت له توكيل
بالبيع لنفسه وللغير
وكمان بنقل الملكيه0000

مين دا اللى مصر
وقعت قوى فى هواه
وكل ما يتكلم تقول الله
وكل دقيقه
تغنى له أغنيه00000

ومين دا بقى
اللى معاه
مفاتيح الشاى والسكر
والهوا والنور والحريه0000

طب ايه رأيك
التوكيل دا مضروب
بص كده يا
عم عطيه

موضوع: بقول لهم .... السبت أكتوبر 02, 2010 7:56 am

بقول لهم

بقول لهم ...........
مين اللى بيعيط بحرقه ده.........
قالوا لى ....
مواطن اتصور وهو بينضرب ...........
قلت لهم .......
ومين الامور اللى بيضحك ده........
قالوا لى .........
ده واحد عمل شويه كوارث وهرب........
قلت لهم ........
والدنيا عتمه هناك كده ليه.....
قالوا لى .....
دى حته جديده بتتخرب .........
قلت لهم ومين الحاوى اللى بتكلم ده..........
قالوا لى .......
ده الوضع بيتقلب ..........
قلت لهم ...
وايه الهيصه اللى فى الساحل الشمالى دى .........
قالوا لى دى البقره بتتحلب.. ..........
قلت لهم ..........
وانتوا قلقلين من كده ليه .........
قالوا لى ...........
اصل بنلاعب الكاميرون......
وخايفين نتغلب .............

على سلامة

موضوع: أم عبد الله ...... السبت أكتوبر 02, 2010 7:57 am

أم عبد الله

أم عبد الله

بقول لها...
احنا ليه يا أم عبد الله...
بنحللها لما نعوز...
و نحرمها لما نعوز...
و نعديها بحجة...
ان الدنيا حظوظ...
عارفة يا أم عبد الله...
أنا نفسى يا أم عبد الله...
يبقى عندى نفوذ...
و تدلعينى بقى يا أم عبد الله...
أحسن و ربنا...
أنحرف و أبوظ...
نفسى يا أم عبد الله...
يبقى عندى سلطة...
و فلوس...
و اللى أقوله يتنفذ...
يعنى قيام قيام...
جلوس جلوس...
و يبقى عندى أراضى كتير...
و بهايم...
معيز وحمير...
و بقر و جاموس...
و نفسى يا أم عبد الله...
ف حتة عيل ياخد كل شئ...
بالأمر المباشر...
من غيرما يسهر و يتعب
و يذاكر...
من غير كتب و مدارس...
و مدرسين و دروس...
قالتلى...
معلش ياخويا...
هو وجع الضروس وحش...
ربنا يشفيك...
يا راجل استغفر ربك...
انت يا راكبك عفريت...
يا ملبوس...

على سلامة

موضوع: كتاب القراءة السبت أكتوبر 02, 2010 7:57 am

كتاب القراءة

بمنتهي البراءة ...
سأليتني …
بنتي نور ....
ف أربع خمس ..
أمور …
مش ف كتاب القراءة ....
قالتلي .. بابا بابا ..
مش إنت .. يا بابا ..
بتكتب أغاني ..
وتقول أشعار ..
أنا سمعت ..
الشيخ يا بابا ...
بيقول إنك يا بابا …
ها تروح النار ...
زي الوحشين يا بابا ...
الحراميين الكفار ....
قوللي يا بابا ....
يعني إيه إستعمار ....
يعني إيه نيل ...
يعني إيه هرم ..
ومين اللي حط ...
النسر فوق العلم ...
يعني إيه يا بابا ...
إستفتاء ….
و يعني إيه إنتخاب ...
ويعني إيه حر ...
ويعني إيه نصاب….
يعني إيه إختلاس ..
ويعني إيه هجاص ..
ويعني إيه خصخصة ..
يعني إيه يا بابا ....
دستور ….
يعني إيه معارضة ..
ويعني إيه مظاهرة ..
وليه النهاردة ...
خدنا أجازة ...
م المدرسة .....
قوللي يا بابا ....
يعني إيه قهر ..
وفين …
خط الفقر ...
ويعني إيه حظ ..
ويعني إيه زهر ...
يعني إيه يا بابا ...
حريه …..
يعني إيه إنسان ..
ويعني إيه سرطان ...
يعني إيه يا بابا ...
خربوها ….
ومين دول يا بابا ..
ولاد القطقوطة ...
ومين دي ...
سمارة يا بابا ....
وإزاي يا بابا ...
ضاعت من قلبك ...
يا بابا .....
إنت معايا ....
فيه يا بابا ناس ...
بتقول كفايه ...
وفيه كمان عساكر ...
مسكين عصايا ...
وبنات متعورين ...
وتانين …
ماشين بيضحكوا ...
هما دول إسرائلين ..
يا بابا .....
ويعني إيه ...
ويعني إيه ...
قولتلها ….
نور …..
ممكن أسألك سؤال
قالتلي ….
إتفضل يا بابا ...
قلتلها ….
هيه قناة Space toon ...
رقم كام …..
وخدتها .....
عشان تنام
بقلم:على سلامه

امير الشعر عفوا واعتذارا

سلوا قلبى وقولوا لى جوابا * لماذا حالنا اضحى هبابا
لقد زاد الفساد وساد فينا * فلم ينفع بوليس او نيابه
وشاع الجهل حتى ان بعضا * من العلماء لم يفتح كتابا
وكنا خير خلق الله صرنا * فى ذيل القايمة وف غاية الخيابا
قفلنا الباب احبطنا الشبابا * فادمن او تطرف او تغابى
ارى احلامنا طارت سرابا * ارى جناتنا اضحت خرابا
وصرنا نعبد الدولار حتى * تقول له انت ماما وانت بابا
وملياراتنا هربت سويسرا * ونشحت م الخواجات الديابه
ونهدى مصر حبا بالاغانى * فتملؤنا اغانينا اغترابا
وسيما الهلس تشبعنا عذابا * وتشبعنا جرائدنا اكتئابا
زمان يطحن الناس الغلابة * ويحيا اللص محترما مهابا
فكن لصا اذن او عش حمارا * وكل مشا اذن او كل كبابا
ودس ع الناس اوتنداس حتى * تصير لنعل جزمتهم ترابا
امير الشعر عفوا واعتذارا * لشعرك فيه اجريت انقلابا
وما نيل المطالب بالطيابه * دى مش دنيا يا شوقى بيه دى غاب

كتب سيد حجاب فى وصف حال مصر الآن

موضوع: اصحى يا مصر السبت أكتوبر 02, 2010 7:59 am

اصحى يا مصر

اصحى يا مصر
اصحى يا مصر
هزى هلالك
هاتى النصر
كونى يا مصر وعيشي يا مصر
مدي اديكى
وطولى العصر
اصحي وكوني وعيشي يا مصر
اصحى يا عامل مصر يا مجدع
وافهم دورك
ف الوردية
مهما بتتعب
مهما بتصنع
تعبك رايح
للحراميه
جهدك عملك
رزق عبالك
عرقك مرقك
ولا يهنا لك
اصحى يا عا مل
غير حالك
صون المصنع
واصنع مصر
اصحى وكونى وعيشي يا مصر

اصحى يا زارع مصر الخضره
قدره وخضره
ونور وجمال
ابدر غيطك
واحمى البدره
ضد الافه
والاستغلال
ارضك عرضك
باب الدار
صبحوا مداسه
للسمسار
نعطش
ولانشربش عكار
وصفه قالوها الحكما يامصر
اصحى وكونى وعيشي يا مصر

واصحى يا جندى
يا تار الشهدا
عمى وخالك
اختى واخوك
لجل ما تهدا وتارك يهدا
فرغ نارك ف اللى خانوك
يابن الشعب يا حامي الشعب
انت املنا فى يوم الصعب
اصحى يا جندى ودق الكعب
حرر مصر وطهر مصر
اصحى وكوني وعيشي يا مصر

احمد فواد نجم

موضوع: سكوت ياتموت السبت أكتوبر 02, 2010 3:59 pm

سكوت ياتموت

عم السكون لو مين تكون
ما تلاقى صوت لينا هنا
انت وانا وكل الجيران
ضاع الكلام م الالسنه
ع المدنه كان فيه صوت ادان
كتمه الزمن من كم سنه
عارف اننا زى الفيران
وما يجرى شىء لو سمنا؟
يوم الانتخاب بعد العذاب
تقدر تصوت زينا
بنعم ولا؟00طبعا يالا
اصله مخلد عندنا
ماسمعنا شىء غير العصا
للى عصا قضا ربنا
عشنا هنا وحنموت اخنا
مستعبدين فى ارضنا

ألف سلامة لضهر سعادتك :

إحنا فداه وف رهن إشارتك
كـل الشـعب بتاعنا بـحالـه :
ينسى أحزانه وخيبـة حالـه
وبيتمنى شفاك وسعادتك
ترجع لينا بألف سلامة :
ويسلم لينا ضهر سعادتك
الأسعار راح نتحملها :
والأوضاع مش ح نعدلها
والتغير ماحناش عايزينه :
احنا هدفنا خلاص عارفينه
ترجع لينا بألف سلامة :
ويسلم لينا ضهر سعادتك
كرسي سعادتك جوه عيونا :
وفوق الروس
مين يستجرا يهوب جنبه :
أو يتك عليه ويدوس
الرجلين ح نجددهالك وبعون الله :
القاعدة كمان ح نجدهالك
وتعيش مرتاح العمر عليه من غير:
ما تحس بأي آلام في الفقرات أو ف العصعوص
بس انت كمان ما تغيبش علينا :
الله يخليك وتسيبنا نلوص
دي الأيام من غير تصريح :
من فم سعادتك ما تعديش
والأحلام من غير ما تعيشها :
معانا سعادتك تبقى كابوس
ترجع لينا بألف سلامة :
ويسلم لينا ضهر سعادتك

وجهه نظر حمار!!!!!!!

عجبي عليك يابن ادم يا كبير الدار

قومت الدنيا وماقعدت لما قالوا حمار

هو اسمي شتيمه ولادى حاجه عار

خلقني ربي وخلقك ولا حدش له خيار

وانا مهما زاد الحمل فوقي صابر على المشوار

لا في يوم اقول اشمعنى اخويا واخد منه تار

ولا يوم ابص لرزق غيري واطق منه واغار

ولا ارفع في يوم عيني على جارتي واصون الجار

ولامهر ادفع لحمارتي وشبكه وسوار

ولا شبكه اجمع في تمنها ولا اجهز دار

ولا حرمي حامل تتوحم عايزه كفيار

ولابنت تخرج عن طوعي وتجيب العار

ولا ابن يدمن ويهلوس ويقع ينهار

عايش حياتي ومتهني وليه افكار؟

باكل وبشرب وانهق ومفيش اسرار

وعندي ابن ادم يخدمني ليل ونهار

ان جعت يشتري برسيمي باغلى الاسعار

وفي مرضي يفضل يعالجني ويدعي الستار

خادم امين من غير راتب ولاحتى ايجار

دلوقتى عرفت يابن ادم مين فينا الحمار!! ؟؟

جمال بخيت - نعى الجنيه

ياما الجنيه صالا وجالا
كان له حكايه وقوالا
كان اسمه له شنه ورنه
كان يغنى على اى سؤالا
كلمنى ابنى..من طابا
قالى صحيح حقه يا بابا
مات الجنيه ولا اصابه
والجانى مين..قول ف عجاله
قلتله مات..دفنه غرابا
غراب كبير ومعاه عصابه
خلو البلد زى الغابه
ويقول كلام بلا افعالا
كداب قوى ف كل كلامه
حتى ان عمه ف يوم لامه
وقال له خف الناس ناموا
واصدق فى بعض الاحوالا
يابنى تعال..لما احكيلك
عن الجنيه ف جيلى وجيلك
وامسح عيونى بمنديلك
لو دمعه نزلت اجلالا
كان الجنيه دايما سيد
فيه رهبه له يوم كان جيد
تطلب جنيه يوم ما تعيد
ومعاك جنيه اغلى امالك
لا كان دولار ولا استرلينى
لا فرنك كان ولا كان صينى
يقدر يقول انا آدينى
لا حتى ين ولا ريال
دخل حمار عليه نهيقه
خرج الجنيه..ضل طريقه
فقد رجولته وبريقه
فرح الحمار..وسكت حالا
ايه معنى ده..قالو التعويم
اخد الجنيه..حبة تنويم
جات المصايب..بالتكويم
وبقينا مضرب امثالنا
عام الجنيه..واحنا غرقنا
سالت دمانا..نشف ريقنا
ولا فيه نهايه لطريقنا
طول مالبلدفيها خبالا
عام الجنيه..عوم امريكا
فلا طوق نجاه لى وليكا
العم سام..قال يحميكا
ويقول تعال..يالا تعالى
جنيهنا بعد اللى جراله
الكل رفص..وساء حاله
لا حتى عمه او خاله
ولا حتى شاه او زبالا
مين كان سبب فى دهوه كله
لو كان عدو حب يشله
لازم معاه حد ودله
وان كان حرام..يبقى حلالا
كلام كتير ياما سمعنا
ان الجنيه..هو بتاعنا
ولا حد يقدر يلاوعنا
اتاريه كلام..كله هبالا
حكومتنا نايمه ولا داريه
بايعه البلد..ام له شاريه
ولا هى كاتبه ولا قاريه
ايه قالوا عنها..او قالا
ماشيه ف طريقها..آهى ماضيه
افكار مفيش ودماغ فاضيه
مات الجنيه..مات بالقاضيه
مات الجنيه الله يرحمه
لاحقنه نافعه ولامرهم
فموته كان ..كان له ارحم
اقرولوا الفتحه يا رجاله...

بقول لهم

بقول لهم ...........
مين اللى بيعيط بحرقه ده.........
قالوا لى ....
مواطن اتصور وهو بينضرب ...........
قلت لهم .......
ومين الامور اللى بيضحك ده........
قالوا لى .........
ده واحد عمل شويه كوارث وهرب........
قلت لهم ........
والدنيا عتمه هناك كده ليه.....
قالوا لى .....
دى حته جديده بتتخرب .........
قلت لهم ومين الحاوى اللى بتكلم ده..........
قالوا لى .......
ده الوضع بيتقلب ..........
قلت لهم ...
وايه الهيصه اللى فى الساحل الشمالى دى .........
قالوا لى دى البقره بتتحلب.. ..........
قلت لهم ..........
وانتوا قلقلين من كده ليه .........
قالوا لى ...........
اصل بنلاعب الكاميرون......
وخايفين نتغلب .............

على سلامة

موضوع: أم عبد الله السبت أكتوبر 02, 2010 4:09 pm

أم عبد الله

أم عبد الله
بقول لها...
احنا ليه يا أم عبد الله...
بنحللها لما نعوز...
و نحرمها لما نعوز...
و نعديها بحجة...
ان الدنيا حظوظ...
عارفة يا أم عبد الله...
أنا نفسى يا أم عبد الله...
يبقى عندى نفوذ...
و تدلعينى بقى يا أم عبد الله...
أحسن و ربنا...
أنحرف و أبوظ...
نفسى يا أم عبد الله...
يبقى عندى سلطة...
و فلوس...
و اللى أقوله يتنفذ...
يعنى قيام قيام...
جلوس جلوس...
و يبقى عندى أراضى كتير...
و بهايم...
معيز وحمير...
و بقر و جاموس...
و نفسى يا أم عبد الله...
ف حتة عيل ياخد كل شئ...
بالأمر المباشر...
من غيرما يسهر و يتعب
و يذاكر...
من غير كتب و مدارس...
و مدرسين و دروس...
قالتلى...
معلش ياخويا...
هو وجع الضروس وحش...
ربنا يشفيك...
يا راجل استغفر ربك...
انت يا راكبك عفريت...
يا ملبوس...

على سلامة

» الكنايات العامية المصرية - أشرف عزيز
» اصل الالفاظ العامية من اللغة المصرية القديمة....سامح مقار
» موسوعة الحضارة المصرية القديــــمة
» موسوعة الحضارة المصرية القديــــمة
» قال الشاعر......قصائد مسموعة