14 نصحية "مجربة" يستخدمها المتظاهرون في حالة إلقاء القبض عليهم

14 نصحية "مجربة" يستخدمها المتظاهرون في حالة إلقاء القبض عليهم
الإثنين, 24-01-2011 - 9:44الإثنين, 2011-01-24 21:44 مصر

[ندعوك للتسجيل في المنتدى أو التعريف بنفسك لمعاينة هذا الرابط]

[ندعوك للتسجيل في المنتدى أو التعريف بنفسك لمعاينة هذه الصورة]
الأمن يشتبك مع المتظاهرين بعنف عادة

بمناسبة الاستعدادت لمظاهرة 25 يناير نشر الناشط محمد جمال بشير على الفيس بوك 14 نصحية "مجربة" لمن قد يتم إلقاء القبض عليهم أثناء المظاهرة والزج بهم في عربة الترحيلات، والدستور الأصلي تنشر النصائح لعلها تفيد أحدا.. ولعل أحد لا يلجأ لها أبدا.. يارب!

1 - خلى خيار القبض عليك آخر حاجة .. حاول تجرى و تهرب.. من الذكاء الا تعتقل من الأساس

2 - فى حالة التقفيل عليك ولا يوجد طريقة للهروب، استسلم حتى لا تصاب ويحصلك مكروه

3 - اول ماتركب العربية لازم تفهم حاجة واحدة مهمة جدا .. ان فى جيش برة من المحامين والمنظمات والقنوات الفضائية هاتنقل الخبر وهاتدافع عنك مهما يحصل

4 - بلاش خوف وفزع اهم حاجة ضبط النفس و الهدوء فى الفترة الاولانية

5 - بعد ما يتقبض على شباب تانى ويبقى عددكم معقول ابتدوا قسموا الادوار .. و اختاروا واحد بس هوه اللى يتكلم بإسم المجموعة و يتفاوض مع ظابط الأمن اللى فى العادة بيكون مش عارف يتصرف

6 - جهز رسالة على موبايلاك لجبهة الدفاع عن متظاهرى مصر و اى حد يقدر يوصل صوتك ان تم القبض عليك و ابعتها فوريا اول ماتدخل العربية لانهم هاياخدوا الموبيلات بعدها بشوية

7 - اول ما العربية تتحرك ابتدوا اهتفو من الشبابيك لمصر و الحرية وخبطوا على جدران العربية من كل الجهات .. لو بتدفع تمن انك اتظاهرت يبقى عرف البلد كلها ان كان فى حاجة بتحصل و انت فى السكة

8 - فى الغالب العربية هاتلف على اماكن كتير لحد ما يوصلها تعليمات .. ماتنشغلش العربية رايحة فين لأن اللى برة كلهم عارفين مكانك هايبقى فين و هايتوجهوا عليه قبليك علشان يبتدوا اجراءات الدفاع

9 - فى حالة انك عايز تقضى حاجتك .. فى ازايز او اكياس هاتلاقيها كدة كدة فى العربية .. و الحل الاحسن انك تعملها تحت عقب الباب على برة علشان تقرف الامن اللى قاعدين فى خلفية العربية

10 - نظم الوقت ما بين الهتاف من الشبابيك و مابين الخبط و مابين لحظات الهدوء اثناء التفاوض

11 - لازم وأنت بتتفاوض تفهم الظابط ان كل المنظمات برة عارفة انتوا فين و انكوا اتقبض عليكوا

12 - أكثروا من الغناء الوطنى لرفع المعنويات .. و خصوصا للناس اللى هايتقبض عليها غلط هايبتدوا ينهاروا و دة دور اللى فاهميين يعرفوهم و يفهموهم

13 - فى حالات هايتم فيها إلقاء المقبوض عليهم فى الصحرا مجموعات بعد ما يكونوا اخدوا بطاريات الموبيلات .. فى كل مكان.. هاتلاقى مواصلات ماتقلقش قول للسواقين على الطريق انك كان مقبوض عليك و اطلب منهم انهم يوصلوك

14 - اهم حاجة متفقدش الروح .. اليوم دة سبقه ايام كتير الناس نزلت فيه علشان بلدها و انت مش اقل منهم وتضحيتك مش اقل من تضحيتهم .. خطوة على خطوة هانوصل