مصر مشيها بطال

مصر مشيها بطال
وسيرتها على كل لسان
ومشية على حل شعرها من زمان
ومرة تنام فى حضن عز ومرة فى حضن جمال
ربنا يخليها لهم هما دول الابطال

مصر مجرمة فى حق نفسها
وف حق شعبها
ولا حد قادر يلمها
ويقولها تلت التلاتة كام
ودايما متفرعنة على شعبها
وبتشرب وتسكر وتسهر مع رجال الاعمال
البركة فى الباشمهندس عز والريس جمال

وبتتأجر بالساعة لاهل الولاء والطاعة
زى اى بدلة وأى فستان
وترجع تتعلق على الشماعة
ياترى بكام الساعة ؟؟؟؟؟
ومحروق ابو الشعب الغلبان
يموت محصور يموت مقهور أو يعيش جبان
مصر عيارها فلت يا جدعان
وتيجى تتكلم
يقولك كل وقت وله ادان
شفتوا الكلام
هى دى مصر للاسف يا سادة ياكرام
أظن الكل هيقول ان شوية عليا الاعدام
والمفروض اتشنق فى ميدان عام

زمان لما كانوا بيسألونى
عن فتاة الاحلام
مكنتش شايف غير مصر قدامى
كنت بقولهم هى فتاتى وهى كل احلامى
ولما كبرت وعرفت أكتشفت أن مصر مشيها بطال
وبقالها سنين مشية فى الحرام
مصر ما بين قوسين مصر عز وجمال
دة واقع مش مجرد كلام
انما احنا المليون مننا بكام؟؟؟؟؟؟
الشاعر
عبد الحميد بدوى